Küçük ayın (fevral) 2-dä Komratta geçti “II. Общественно-политический форум «Гагаузия-2016: состоятельность автономии» (II. Cümnä-politika forumu “Gagauziya-2016: avtonomiyanın var oluşu probleması” – rusçadan forumu hazırlayannarın çevirisi. Gagauzça haliz lääzım olsun “Gagauziya-2016: avtonomiyanın var olması” – nışan “Ana Sözü”). Forum adandı 2014-cü yılın Küçük ayın (fevral) 2-dä Gagauziyada Referendumuna. Forumu ortak hazırladılar Gagauziyanın İspolkomu, Halk Topluşu, pravitelstvo dışında kuruluşları «Про-Евразия» hem «Национальный институт развития и реформ Гагаузии».
Nicä bilersiniz artık 2014-cü yılın Küçük ayın (fevral) 2-dä Referenduma çıkarıldıydı soruşlar: “Gagauziya halkın dış yolunu kendibaşına seçmä hakkın kalınmış statusu için”, “Rusiya, Belorusiya hem Kazahstan arasında Tamojnä Birliinä girmää deyni soruşun incelemesindä Tamojnä Birlii için” hem “Moldovanın Evropa Birliinä girmesi için” soruşlar. Onuştan II. Cümnä-politika forumu da Rusiyaya hem EVRAZÊSa emin altında geçti. Bu üzerä da Foruma musaafir oldular hem onda pay aldılar sadä Rusiyanın hem Rusiya yanı olan Moldova soţialistlar partiyasının hem Pridnestrovye temsilcileri. O musaafirlerin arasında vardılar Moldovada Rusiya Büükelçisi Farit MUHAMETŞİN, Rusiya Dumasının deputatı Elena DRAPENKO, Rusiya Dumasının Federaţiya Sovetinin azası İgor MOROZOV, Tatarstan Respublikasının (Rusiya Federaţiyası) deputatı Albert HABİBULİN, Moldova soţialistlar partiyasının başı İgor DODON hem başkaları.
Forumun başında gösterildi dokumental film «Референдум Гагаузии – воля народа».
Bundan sora da Moldovanın hem Gagauziyanın gimnarınnan Forumun ofiţial açılışı yapıldı.
Açılışta ilkin söz tuttu Gagauziya Başkanı İrina VLAH. Sora Nasaat etti Gagauziya Halk Topluşu Başı Dimitriy KONSTANTİNOV. Nedän sora da selemlama sözlerini söledilär: Mihail KENDİGELÄN, Elena DRAPENKO, İgor MOROZOV, İvan BURGUCU, Albert HABİBULİN, Mihail FLAH, İgor DODON, Konstantin KELEŞ, Leonid DOBROV, Roman TÜTİN, Sergey BUZACI, İgor ŞORNİKOV, Valeriy YANİOGLU, Aleksey KOŞEL, İgor KROYTOR, Anatoliy TALMAÇ.
Selemnama sözleri bittiynän Gagauziyanın Başkanı İrina VLAH baaşladı “Şükür Belgelerini” Referendumu hazırlayan aktivistlara.
Bundan sora başladı ilk plenar sesiyası: «Политическая и экономическая состоятельность Гагаузии: новые вызовы». Onun moderatoru oldu genç gagauz politikacısı Anatoliy TALMAÇ. Sesiyada pay aldılar hem nasaat ettilär Gagauziya Başkanın birinci yardımcısı Vadim ÇEBAN, Halk Topluşu deputatı Sergey ÇİMPOEŞ, ekonomikada ekspert Mihail POYSİK, Moldova Parlamentın deputatı Vladimir GOLOVATÜK hem jurnalist Sergey MANASTIRLI.
Forumun ikinci plenar sesiyasının teması “Gagauz dili hem kulturası: eni yol” oldu. Onda pay aldılar: genç gagauz yazıcısı İlya KARASENİ (moderator), Gagauziyanın M.Maruneviç bilim Merkezin başı Pötr PAŞALI, Gagauziya genç yazıcılar birlii cümne kuruluşun başı Alla BÜK, genç yazıcı Nikolay YALANCI, akademik hem yazıcı, “Ana Sözü” gazetasının baş redaktoru Todur ZANET.
II. Cümnä-politika forumunda nasaatları hem teklifleri elektän geçirdiktän sora, Forumun kararı cümneyä açıklanacek.
Not. 2014-cü yılın Küçük ayın (fevral) 2-dä Gagauziyada Referenduma pay aldı 70 376 kişi. Bu seçim hakkı olan Gagauziya insannarından 70,04%. “Gagauziya halkın dış yolunu kendibaşına seçmä hakkın kalınmış statusu için” kendi kayıllık sesini 98,8% (68 023 kişi) verdi, karşı – 1,1% (1 324 kişi) çıktı. Rusiya, Belorusiya hem Kazahstan arasında Tamojnä Birliinä girmää deyni soruşun incelemesindä Tamojnä Birlii için 98,47% (68 182 kişi) kayıllık sesini verdi. Karşı – 1,52% (1 057 kişi) çıktı. Moldovanın Evropa Birliinä girmesi için 2,57% (1 718 kişi) oy kullandı. Karşı – 97,43% (66 643 kişi) çıktı.
